Garcia miklaro nga way kondisyon ang iyang paghatag og tabang

CEBU, Philippines —  Gihimug-atan ni Cebu City mayor Raymond Alvin Garcia nga wala siya’y pili sa panerbisyo sa publiko alang sa Dakbayan sa Sugbo.

Gihatagan og katin-awan sa mayor ang hungihong nga matud pa nga mohatag siya og tabang pinansyal sa mga lumulupyo sa dakbayan aron nga mobalhin kini og dapig kaniya alang sa umaabot nga piniliay karong Mayo 2025.

Matud pa niya nga walay siya’y gipili sa paghatag og ayuda nga alang sa mga lumulupyo sa dakbayan bisan pa man og nagsuporta kini sa iyang kaatbang sa eleksyon. 

“They have their own candidates already and they have their own parties. Wala gyud ko mo-make it as a pre-condition nga in order for them to get financial assistance, kinahanglan gyud sila mo-pledge og support ni Mayor Raymond Alvin Garcia. Wala gyud na nako buhata”, pagklaro pa ni Garcia atol sa press conference kagahapon.

Kagahapon, laing 22 na sab ka barangay sa dakbayan ang gihatagan og P5 million alang sa tabang sa mga proyekto ug mga programa sa barangay.

Sumala pa ni Garcia, niabot na ngadto sa 61 ka barangay gikan sa 80 ka barangay ang nahatagan sa ilang financial assistance ug malaumon siya nga makaapas pa ang ubang barangay sa pagduso sa mga gikinahanglan sa dili pa ang campaign period aron mapagawas usab ang pundo nga dili pa magsugod ang kampanya. (BANAT NEWS)