Mga tunghaan sa Dakbayan sa Talisay ipasusi  

CEBU, Philippines — Makig-alayon si Talisay City mayor Gerald Anthony "Samsam" Gullas sa Department of Education (DepEd) aron masusi ang sitwasyon sa mga tunghaan sa dakbayan sa Talisay.

Kini aron malikayan ang nahitabo sa Buhisan Elementary School sa dakbayan sa Sugbo nga namiligro sa pagdahili sa yuta.

Suma pa ni mayor Gullas nga iyang manduan ang Office of the Building Official, City Engineering ug CDRRMO sa pagsusi sa mga tunghaan ilabi na kadtong nahimutang sa mga fault line.

Ang Chairman sa Committee on Disaster Resilience sa siyudad sa Talisay, konsehal Danny Caballero, nibutyag nga mopapasar siya og resolusyon sa pag awhag sa city engineering office nga mohimo sa katuyoan.

Matud pa ni Caballero nga mas maayo nang makabantay daan aron kalikayan ang kadaot nga mahiagoman sa mga tinun-an. Si mayor Gullas niingon nga makig-alayon sila sa Department of Education sa Talisay labot sa ilang pagahimoon nga inspection sa mga eskwelahan. (BANAT NEWS)