Negosyante gitulis; polis iyang gireklamo

CEBU, Philippines — Naglusad karon og lawom nga imbestigasyon ang Cebu City Police Office mahitungod sa nahitabong pagpanulis niadtong bisperas sa Bag-ong Tuig, Disyembre 31, 2024 nga mibiktima sa usa ka negosyante og cellphone.

Si Police Lieutenant Colonel Maria Theresa Macatangay, Deputy City Director for Operations ug tigpamaba sa CCPO miingon nga patabangon nila sa Guadalupe Police Station ang mga sakop sa intelligence ug investigation tracker team aron pagpangita sa tulo ka tulisan.

Ang maong hitabo nakuha sa CCTV sa lugar. Matud pa sa biktima nga si Remark Broa nga nahinabi sa dySS Super Radyo Cebu, nasakiyo sa mga tulisan ang iyang cash nga P2.5 milyones, mga alahas, mga nagkalain-laing cards, cellphone, ug uban pa.

Matud pa sa biktima nga padung na siya mogarahe diha sa gate sa giabangan niyang balay adtong tungora.

Kini nitug-an nga nakabantay siya nga dunay nagparking nga motorsiklo atubangan sa gate sa dihang padung na niya kining sirad-an og balik apan kalit nga nisulod ang tulo ka mga armadong lalaki ug gimandoan siya sa pagbalik og sakay sa iyang sakyanan.

Gi-tape matud pa sa mga tulisan ang iyahang baba apil na ang iyang kamot ug gipahapa.

Pagkahuman niini, gikuha sa mga tulisan ang mga butang nga naa sa sulod sa sakyanan apil niini ang cash nga nagkantidad P2.5 milyones nga gibutang sa iyang paper bag, mga alahas, nagkalain-laing mga cards, ug uban pa.

Human sa maong panghitabo nisibat ang mga tulisan sakay og motorsiklo. Ayha pa nakapangayo og tabang ang  biktima sa dihang iyang natangtang ang tapes.

Si Macatangay miingon nga naay gidudahang mga tawo ang biktima nga posibleng maoy naghimo nagtulis kaniya. Gikataho nga dunay kontra sa negosyo ang biktima.

"Actually naa siya'y mga tawo nga naa siya'y duda iyahang gisulti sa police and then part na siya sa imbestigasyon karon," sigon ni Macatangay.

Apil sa subayon sa kapulisan kun sinugo ra ba ang mga tulisan o sila mismo maoy nitulis sa biktima.

Sa laing bahin, nahiubos ang biktima tungod sa matud pa taras sa polis nga iyahang giduol aron unta mangayo og police report bahin sa insidente nga iyahang gamiton suporta pagkahanaw sa mga importanteng dokumento nga giapil og kuha sa mga tulisan.

Giingnan matod pa siya niini nga: “kun nagdali mangita og laing imbestigador kay dili ra siya ang giatiman.”

"For that matter of course we are not tolerating any kind of act of such kind coming from our police personnel so of its true definitely that personnel will be sanctioned administratively but since we are able to obtain this kind of complaint we will subject that particular complaint for investigation. We have directed already the Station 7 nato the investigators to reach out to the victim and obtain his sworn statement so that we can pursue with our admin investigation," sigon ni Macatangay.- IBM BANAT NEWS