Tulo ka nag-edad og 100 anyos gihataga'g tag P100,000 -

CEBU, Philippines — Nakadawat og tag P100,000 gikan sa kagamhanan sa Probinsya sa Sugbu ang tulo ka centenarian sa lain-laing mga lungsod sa habagatang Sugbo.

Si Gobernador Gwendolyn Garcia mismo ang mitunol sa mga tseke ngadto sa mga centenarian nga taga dakbayan sa Carcar ug Talisay niadtong Disyembre 17, atol sa laing hugna sa Caravan of Government Services nga gipahigayon sa lungsod sa Minglanilla.

Si Profiria Alcorcon ug Flora Tanudra Aledon pareho nga taga Carcar City, ug si Vicente Adlawan Restauro, nga taga Talisay City midawat sa tabang pinansyal gikan sa Kapitolyo.

Si Alcorcon, Aledon, ug Restauro pareho nga natawo sa buwan sa Nobyembre tuig 1924.

Matud pa sa Sugbo News sa Kapitolyo, ang sekreto sa tulo sa taas nga kinabuhi mao ang pagmentinar sa himsug nga diet ug ang hugot nga pagtuo sa Ginoo. Ang kinaon sa tulo mao ang mais, Utan Bisaya, ug isda.

Ang maong tabang gipadayag isip pagpasalamat sa ilang dugay nang serbisyo ug kontribusyon alang sa ilang tagsa-tagsa ka komunidad.

Gawas sa tseke, gitagaan usab sila og mga bitamina, wheelchair alang sa mga hamtong, ug Abag Sugbo cards nga naghatag kanila og libreng medikal nga konsultasyon ug tambal sa bisan asa sa 16 ka ospital nga gipadagan sa Kapitolyo.

Ang Department of Social Welfare and Development (DSWD) naghatag usab ug dugang nga tabang pinaagi sa food packs ug P2,000 nga pinansyal nga ayuda. Samtang, ang Department of the Interior and Local Government (DILG) mihatag usab og lima ka kilo nga bugas ug tsinelas sa duha ka centenarian. (BANAT NEWS)