Duha ka edipisyo nasunog sa Bantayan, kapin P2M ang danyos

CEBU, Philippines — Niabot sa kapin dos milyones pesos ang danyos sa nahitabong sunog sa duha ka edipisyo sa Barangay Binaobao, Lungsod sa Bantayan, Isla sa Bantayan kagahapon sa buntag.

Matod ni Fire Officer 2 Jason Giganto, fire investigator sa Bantayan Fire Station nga nahinabi sa DYSS Super Radyo Cebu nga sa gibutyag sa tag-iya sa edipisyo nga nagsugod ang sunog pasado alas 4 sa kadlawon kagahapon.

Nadawat sa kabomberohan ang alarma sa sunog alas 5:35 sa buntag ug gisaka kini sa General alarm pagka alas 5:50.

Nakontrolar ang sunog pagka alas 9:05 sa buntag ug hingpit nga napawong pagka alas 9:35 sa buntag.

Ang duha ka apektadong edipisyo kay usa ka lodging house ug usa ka tindahan.

Totally burned kun hingpit nga naugdaw ang tindahan samtang partially burned ang lodging house. Wala hinooy nasamdan sa maong sunog.

Padayon pa ang imbestigasyon sa Bantayan Fire Station aron madeterminar ang hinungdan sa sunog. (BANAT NEWS)