900 citation tickets naisyu diha sa SRP

CEBU, Philippines — Naka-isyu og dili momenos 900 ka citation tickets ang SRP Traffic Group sukad pa niadtong Nobiyembre 5, 2024.

Matud pa ni SRP Traffic Group operations head Jounald Bautista atol sa Cebu City Transportation Office (CCTO)’s Traffic Hour teleradyo program pinaagi sa Sugboanon Channel nga kasagaran sa mga violators mga drayber sa mga trak nga adunay busted clearance lights ug dili kompleto nga dokumento ug lakip na sab ang mga motorsiklo nga nasakpan nga nagmaneho sa gawas sa ilang lane.

Gawas sa motorcycle lane violators, pipila ka mga drayber sa motorsiklo ang giisyuhan og citation tickets tungod sa ilang mga kalapasan sama sa pagdrayb nga walay lisensya, wala makaparehistro, ug paggamit sa expired nga student permit.

Dugang pa nga naka-impound sab ang SRP Traffic Group og 73 ka mga motorsiklo, duha ka four-wheeled nga mga sakyanan ug unom ka trailer trucks human ang mga tag-iya niini nakalapas sa daghang traffic violations sama sa kakuwang sa dokumentasyon ug kagang-kagang na kaayo.

Adunay say natala ang grupo og 43 ka mga insidente sa disabled vehicles sa SRP kun kasagaran niini mga truck.

Mipahinumdom si Bautista sa mga truck operators nga inspeksyunon gyud ang road worthiness sa mga truck sa dili pa padaganon kay kung ma-aberya kini sa SRP, matag oras nga mo-isyu og citation ticket ang ilang buhatan ngadto sa mga drayber.

Mipahimangno sab si Bautista sa mga motorista nga magmabinantayon sa pag-agi sa SRP ilabi na nga ang siyudad nag-designate sa maong dapit isip “discipline zone” mao nga mas istrikto gyud ang ilang pagpanakop sa SRP.

Matud pa ni Bautista nga nakatala og 54 ka aksidente sa SRP kun diin matud pa niya nga gamay nalang kini kun itandi kaniadto nga wala pa namugna ang ilang grupo kun diin kanunay gyud kini nga nakatutok sa dagan sa trapiko ug pag-implementar sa mga lagda sa trapiko sa SRP. (BANAT NEWS)