Namatay human iyang gipamusil iyang pamilya

CEBU, Philippines — Gipamusil sa retiradong seaman ang iyang pamilya samtang nangaon didto sa ilang panimay sa sitio San Miguel, Barangay Linao, Dakbayan sa Talisay kagahapon sayo sa buntag, niresulta kini sa pagkaangol sa iyang mga napusilan apan siya gikatahong giatake sa kasing-kasing ug maoy nakabsan sa kinabuhi.

Ang suspek nag-edad na og 67-anyos ug usa na ka person with disability (PWD) tungod giputol na ang tuo niini nga tiil tungod sa sakit nga diabetes.

Ang mga biktima mao ang iyang 60-anyos nga asawa ug ilang mga anak niini nga 33 anyos nga lalaki ug 20 anyos babaye.

Ang asawa nasamdan sa iyang tuo nga abaga samtang sa tiyan ang samad sa anak nga babaye ug sa nawong sab sa anak nilang lalaki.

Atol sa pagpamusil,  gikatahong nakiglayog ang mga biktima sa suspek ug nailog ang armas gikan kaniya, apan atol sa linayogay giatake kini sa sakit sa kasingkasing ug maoy gidudahan sa iyang kamatayon.

Sa inisyal nga imbistigasyon sa kapolisan nasuta nga nangaon sa pamahaw ang mga biktima sa dihang nigawas gikan sa iyang kwarto ang suspek nga armado og revolver  ug diretsong gipamusil ang iyang pamilya diha sa kan-anan. Matud pa ni Police Lt. Col. Epream Paguyod, hepe sa kapolisan sa Talisay gisuwayan gihapon sa pagtabang sa iyang pamilya ang suspek apan nakabsan na gyud kini sa iyang kinabuhi.

Gidala sa tambalanan ang mga biktima, sigon pa ni Paguyod nga bangi sa propriyedad ang motibo sa sa amahan sa pamilya nganong iyaha kadtong nabuhat. (BANAT NEWS)