CEBU, Philippines — Nipasaka og reklamo si Atty. Mikel Rama batok kang Cebu City Mayor Raymond Alvin Garcia ngadto sa Ombudsman tungod sa matud pa nga grave misconduct, dishonesty, refusal to discharge elective office, abandonment of office o position.
Ang pagpasaka og kaso mahitungod kini sa paghurar niini isip mayor sa dakbayan niadtong Oktubre bisan pa man og gilauman pa nga mobalik sa katungdanan ang iyang amahan nga si dismissed Michael Rama human sa 180 ka adlaw nga pagpaubos og preventive suspension.
Matud pa sa reklamo walay legal nga basehan ang pagpahurar kang Garcia nga gipaundayunan ni DILG-7 Director Leocadio Trovela, kay ang gihimong basehan mao lang ang nikatap sa social media nga giingong desisyon sa Ombudsman nga penalty of dismissal from service bisan pa man og wala pa makadawat sa hukom ang hingtungdan.
Nakita sab ni Atty. Mikel sa social media ang laing Memorandum nga pinetsahan niadtong Oktubre 5 nga wala nagmando ang Deputy Ombudsman for the Visayas nga ipatuman ang desisyon batok sa iyang amahan.
Gani, gitahasan si Trovela nga mao ang magpamatuod o mo-verify sa pagpatuman sa bisan unsang desisyon gikan sa Ombudsman bahin sa kaso ni Rama kun diin mao kini ang butang nga wala pa niya mahimo hangtod karon.
Apan ang gibuhat matud pa ni Trovela, nideklarar kini nga bakante ang posisyon isip Vice Mayor ug mao kini rason sa pagsaka sa posisyon ni Garcia. Si Trovela nag-atubang sab og samang kaso gikan gihapon sa kampo sa mga Rama.
Hangtud karon wala makabalik si Rama sa iyang buhatan gumikan kay gikandaduhan kini atol sa iyang pagbisita niadtong miaging semana.
Sa complaint, nalatid nga “Garcia is guilty of refusal go discharge elective office under Articles 234 of the Revised Penal Code” kun diin wala kini mobuhat sa iyang katungdanan isip bise mayor.
“Respondent Garcia's refusal to perform the functions of Vice Mayor, despite having been duly elected, denies public services, and indermines the integrity of the office. It constitutes a breach of his legal and moral obligation to serve the people of Cebu City, thereby disrupting the proper functioning of the Sangguniang Panlungsid and denying the people of Cebu the services to which they are entitled”, nasulat pa sa reklamo. Kasong administratiba ug kriminal nga kaso ang ipasaka ni Atty. Mikel batok kang Garcia. — /IBM (BANAT NEWS)