CEBU, Philippines — Nagpadayon ang imbestigasyon sa Waterfront Police Station 3 Cebu City Police Office(CCPO) sa nahitabong pagpamusil sa Alviola Street, Barangay Tejero, siyudad sa Sugbo niadtong Miyerkules sa hapon, Nobiyembre 27, 2024. Giila ang biktima nga si John Dave Estoton, 26, call center agent ug matud pa original gangster (OG) sa usa ka gang. Samtang ang suspetsado nagsul-ob og itom nga sweatshirt ug karsones, naka blue mask ug puti nga helmet.
Una niini, sa wala pa gipusil ang biktima nagkugos kini og bata ug iyaha kining gibutang sa kuna ug nihigda sa plastik nga bangko aron matulog apan niabot ang mga mamumuno ug gidul-it og pusil ang ulo niini.
Si Police Major John Lynbert Yango, hepe sa Waterfront Police Station 3 miingon nga ilang gisubay kun may koneksyon sa pagka-gang member,pagka-rapper, paghupot og armas ug sa rekord niini sa illegal nga drugas kaniadto ang pagpatay kaniya.
Ang apohan niini nga si Erlinda Mendiola, mitug-an nga napriso na kaniadto og upat ka tuig tungo sa ilegal nga drugas ang iyang apo apan nagbag-o na kini dihang nakagawas.
Gianugonan siya sa apo kay mga gagmay pa ang mga anak niini. Nangayo sila karon og hustisya para sa apo. (BANAT NEWS)