Sugbo Negosyo mas gipalapdan sa Kapitolyo

CEBU, Philippines — Ang Sugbo Negosyo nga programa sa Probinsiya sa Sugbo mas gipalapdan pa sa Kapitolyo pinaagi sa usa ka kasabotan  tali sa probinsiya, Food and Drug Administration ug sa Department of Science and Technology (DOST).

Ang maong kasabotan maghatag og kahigayonan sa beneficiaries sa Sugbo Negosyo nga mapalambo ang ilang produkto hilabina sa “food safety standards” pinaagi sa mga mahinongdanon nga training, technical support ug licensing.

Subay sa maong kasabotan, ang FDA maoy mopahigayon og training kalabot sa Good Manufacturing Practices sa pagkaon ug cosmetic safety, capacity building, ug mo-introduce og automated system alang sa licensing ug pagparehistro sa beneficiaries aron masiguro nga sila nisubay sa regulasyon.

Sa bahin sa DOST, mohatag usab kini og technical advisories services sama sa product development ug pagpanindot pa sa packaging sa produkto aron mapalambo pa ang kalidad niini ug “market competitiveness sa mga micro small medium entrepreneurs (MSMEs).

Si Gobernador Gwen Garcia, FDA Director General Dr. Samuel Zacate ug DOST Region-7 Director Jesus Zamora maoy nipirma sa maong memorandum of understanding (MOU) niadtong Nobiyembre 11, 2024 diin gisaksihan kini sa opisyales sa Kapitolyo ug sa nahisgotang mga ahensiya.

Atol usab sa maong kalihokan ang beneficiaries sa Sugbo Negosyo Season 3 nakadawat sa unang tranche sa assistance sa Kapitolyo nga P20,000 pinaagi sa QR-coded cards. (BANAT NEWS)

Show comments