CEBU, Philippines — “Eat Well, Live Well” 2024 Youth Summit gipahigayon sa dakbayan sa Sugbo, adlaw nga Sabado nga giapilan sa pipila ka mga tulonghaan og youth leader.
Ang kalihukan gitambongan sa mga opisyal sa Department of Education, Department of Environment and Natural Resources, Department of Agriculture ug sa presidente sa Ajinomoto Philippines Corporation nga si Koichi Ozaki.
Matud pa ni Dr. Salustiano Jimenez, ang rehiyonal nga director sa DepEd-7 tumong sa kalihukan mao ang pag-edukar sa mga learners kabahin sa himsog nga panglawas pinaagi sa pagkaon og masustansya nga pagkaon.
Dugang ni Jimenez nga kun adunay gikaon ug sakto ang bata dili usab kini magluya sa higayon nga mosulod kini sa ilang mga klase.
Ang nanambong nga mga learners o youth leaders naggikan sa mga tunghaan dinhi sa Sugbo ug malaumon ang kadagkuan sa DepEd nga makasalmot usab ang ubang mga tunghaan sa Central Visayas sa umaabot nga kalihukan.
Si Jimenez nipadayag nga dako kaayo ug tabang ang partnership nila sa Ajinomoto Philippines ilabi na sa suporta nga ilang gihatag sa DepEd.
Atol sa maong tigum gawas sa edukasyon gituki usab ang mga butang nga may kalabutan sa kalikupan, pagpanguma ug uban pa. Sumala pa ni Ozaki, usa sa ilang tinguha sa 2030 nga mokubos ang environmental impact ngadto sa 50 porsyento human aduna silay gihimo nga mga initiatives ilabi na sa pagtabang sa kalikupan.
Dugang pa ni Ozaki, ilang gilakip ang Sugbo sa kalihukan tungod kay dako iyang pagtuo nga makatabang sa kabataan sa ilang maayong kaugmaon ang pag edukar kanila ingon man pakig-alayon sa kabatan-onan.