CEBU, Philippines — Tungod sa nahitabong komosyon diha sa Cebu City Hall niadtong adlaw nga Biyernes si Mayor Raymond Alvin Garcia mimando nga ilisan ang pangulo sa Civil Security Unit sa city hall nga si Chuck Cañete.
Kahinumdoman nga niadtong Biyernes, gitugotan nga makahimo og rally ang mga supporter sa gitaktak nga si mayor Michael Rama diha sa gawas sa city hall, apan si City Administrator Collin Rosell gikatahong pugsanong misulod sa iyang kanhi opisina aron mobalik sa trabaho kay matud niya napaso na ang iyang unom ka bulang suspensyon.
Samtang gimando ni Mayor Raymond Garcia nga ipatuman ang “maximum tolerance” sa nahitabo, wala makalikay niini si Chuck Cañete isip pangulo sa mga gwardiyang nagbantay sa edipisyo sa city hall.
Si Cañete kinsa CSU head na kaniadto pa sa panahon ni Rama gihulipan ni Ariel Yburan, sumala pa sa report sa Cebu City PIO.
Si Yburan, kanhi barangay captain sa Sawang Calero gipaila nilang city administrator Kristine Batucan ug City attorney Santiago Ortiz Jr. sa mga department heads atol sa meeting niadtong adlaw nga Biyernes.
Si Batucan mitug-an sa mga department heads nga si Mayor Raymond Alvin Garcia, ang regional director mismo sa DILG ang mibutang kaniya sa pwesto. Wala say nadawat nga kamandoan ang Mayor’s Office o ang City Administrator’s Office gikan sa Office of the Ombudsman ug DILG nga pagbakwi sa dismissal order kang Rama. Mao nga masaligon si Batucan nga duna silay legal nga otoridad.
Apan ang anak ni Rama nga si Atty. Mikel Rama miinsister nga ang iyang amahan pa gihapon ang mayor sa siyudad “by operation of law.”
“The Memorandum dated 5 October 2024 issued by Regional Director of DILG 7 Leocadio T. Trovela “informing” Raymond that he is to assume as Mayor is a mere scrap of paper,” matud pang Atty. Mikel sa iyang post sa Facebook.
Matud pa niya, “Regional Director has no power to declare a permanent vacancy. Under Section 25 of the Local Government Code, only the Office of the President has the supervisory authority over highly urbanized cities.”
Wala sab sa desisyon matud pa nga nagmando sa DILG Secretary nga ipatuman ang maong kamandoan.
“Tallado vs. COMELEC says that "implementation" of the removal is the operative act of creating a vacancy. There was no implementation. The status quo is that there is no vacancy. Mayor Michael L. Rama is the Mayor of Cebu City by operation of law,” panapos pang Atty. Mikel. (BANAT NEWS)