CEBU, Philippines — Si Archbishop Jose Palma sa Archdiocese of Cebu nasubo sa insidente nga naglambigit sa usa ka resident priest sa parokya Bantayan Island kinsa nakasugat og disgrasya sa may Lungsod sa Santa Fe, Huwebes sa gabii.
Matud pa ni Palma, nasubo siya sa maong taho apan nagtuo siyang adunay mga rason kun nganong nahitabo kini apan para niya kun dunay tulobagon, kinahanglan kining atubangon sa maong pari.
Nagpaabot pa si Palma sa report gikan sa parokya ug gusto niyang sutaon ang hinungdan sa maong aksidente.
Gitug-an sa Arsobispo nga nasubo siya nga adunay mga naangol insidente nga kinahanglang sagubangon sa maong pari ug responsibilidad karon sa simbahan nga tabangan ang mga biktima.
Kahinumdoman nga tulo ka tawo ang nangaangol nga sakay og duha ka motorsiklo sa dihang nadumbolan sa sakyanang gimaneho sa maong pari.
Dunay nigawas nga mga alegasyong hubog kini apan walay independenteng source nga naka-beripika niini gawas lang sa pamahayag sa kapolisan.
Ang Arsobispo nipadayag nga dili malikayan ang mga tawo nga hukman ang maong pari tungod sa maong insidente. (BANAT NEWS)