Mga magtutudlo nga gipabayad sa ilang COLA nangita og sumada
CEBU, Philippines — Human mabayri ang disallowance gikan sa Commission on Audit (COA) sa ilang Cost-of-Living Allowance (COLA), ang mga magtutudlo ubos sa Department of Education (DepEd) sa dakbayan sa Sugbo nangayo og katin-awan sa status sa ilang mga bayranan.
Mao kini ang resolusyon ni Konsehal Nestor Archival Sr. nga giaprobahan sa konseho sa dakbayan. Sa pakighinabi kagahapon (Domingo), si Archival mitug-an nga nitumaw kini dihang niabot sa iyang buhatan ang grupo sa mga pampublikong magtutudlo.
Niadtong 2016 dihang gi-disallow sa COA ang P10,000 nga COLA sa mga pampublikong magtutudlo gikan niadtong Enero hangtud Disyembre 2015. Mokabat sa P80 200,000 ang kinatibuk-ang kantidad sa COLA.
Matud ni Archival, sukad niadtong 2018, ang magtutudlo nga nakabenepisyo sa COLA gi deduct og P5,000 matag tuig sa ilang sweldo aron makabawi sa wala gitugot nga COLA.
“Ang nahitabo man gud kay nasugdan silag 2018 og deduct nya until now, nag sige pa man og deduct. Kung P10,000 ra (disallowed COLA), nahuman na,” matud ni Archival.
Si Archival nangayo og comprehensive nga report gikan sa City Accounting Office sa status niining mga bayranan sa mga apektadong magtutudlo sa DepEd sa dakbayan sa Sugbo.
Sa laing aprobado nga resolusyon ni Archival, gipangayo sab ang listahan gikan sa DepEd sa Cebu City Division ug sa Local School Board. “Nag sige man sila og minus karon mao nga naguol sila kay wa may sumada, wa man sila kabalo pilay gi minus totally, nya pila nalang sad ilang nahatag, which is sa ilang gitan-aw nakahatag na siguro sila og P25, 000 or P20, 000,” matud ni Archival. —/MEL (BANAT NEWS)
- Latest
