CEBU, Philippines — Gipalabang sa unang pagbasa sa hunta probinsiyal ang P25 bilyones nga gisugyot nga annual budget sa executive sa Probinsiya sa Sugbo alang sa tuig 2025 atol sa regular session sa niaging adlaw.
Human mapalabang sa unang pagbasa, ang maong appropriation ordinance gi-refer kini sa committee on Budget and Appropriation alang sa pag-review niini.
Apil sa nahisgutang budget ang P14 bilyones nga Annual Investment Plan for Development Projects sa probinsiya sa sunod tuig.
Lakip usab sa annual budget nga makuha sa general fund sa Kapitolyo ang pagpundo alang sa operasyon sa mga hospital nga gidumala sa probinsiya , Cebu South Bus Terminal (CSBT) ug Cebu North Bus Terminal (CNBT), ug ang Cebu Provincial Inter-LGU Waterworks System Office.
Ang maong mga pundo ipaubos sa budget hearing o tukion sa komitiba nga gipangulohan ni Bokal Glenn Anthony Soco sa dili pa kini ipasar sa second reading ug third reading sa Sangguniang Panlalawigan.
Apil usab nga giaprobahan sa provincial board atol sa session niini gahapon mao ang P371 milyones nga pundo sa Provincial Disaster Risk Reduction and Management Plan ug ang P1.2 bilyones nga Gender and Development Plan nga parehong alang sa tuig 2025. (BANAT NEWS)