CEBU, Philippines — Nipadayag og kabalaka si Konsehal Mary Ann Delos Santos human nakadawat sa report gikan ni Daisy Villa pangu sa Cebu City Health Department kabahin sa padayon nga nagkasaka nga kaso sa dengue sa Dakbayan sa Sugbo.
Tungod niini, gikwestyon ni Delos Santos ang ka-epektibo sa kampanya batok sa dengue sa syudad human nga miabot na sa 11 ka mga indibidwal ang namatay base sa datus niadtong buwan sa Septiyembre ning tuiga.
Moabot na sab sa 2,831 ka kaso ang natala base sa datus nga gipagawas niadtong Oktubre 3 diin 941 ang kumpirmado ug ang 1,890 mga suspected cases lang. Ang maong numero taas na gyud kini kung itandi niadtong miaging tuig.
Base sa maong datus nga 70% sa kumpirmadong namatay sa dengue nagpangidaron ngadto sa 3-12 anyos ug aduna say usa ka 75 anyos.
Si Konsehal De los Santos nanawagan kang Mayor Raymond Alvin Garcia nga tutukan pag-ayo ang pagdumala sa CHD tungod kay matud pa nga ang datus nga gipakita niini matawag nga “incompetence” ug “inefficiency of the management".
Matud pa ni De los Santos hangtud karon wala gihapoy konkreto ug komprehensibo nga solusyon ug aksyon ang siyudad aron maminusan ang mga insidente sa dengue.
Sa report ni Villa gipatuman na nila ang dengue prevention campaign sa mga barangay nga adunay daghang kaso sa dengue ug mao kini ang “5S” -- search and destroy, secure self-protection, seek early consultation, support vector-control measures, ug sustain hydration.
Si Konsehal Rey Gealon nangayo sa Department of Health-7 alang sa ilang teknikal nga tambag ug aksyon sa makapaalarma nga gidaghanon sa mga kaso kalabot sa pagdeklarar sa dengue outbreak.
Mihangyo usab si Gealon ngadto sa CHD nga makig-alayon sa DOH-7 aron magmugna og aksyon batok sa dengue.
Kahinumduman nga niadtong Septiyembre, niawhag sab si Villa ngadto kang Mayor Garcia nga modeklarar nga ipaubos ang syudad sa state of calamity tungod sa nagpadayong pagsaka sa kaso sa dengue apan matud pa ni Garcia nga dili na kinahanglan ang maong deklarasyon. (BANAT NEWS)