CEBU, Philippines — Sikop ang suspetsado sa pagpamusil sa hepe sa tanod sa Barangay Candulawan, Dakbayan sa Talisay human sa gipahigayon nga buy-bust operation sa kapolisan sa siyudad diha sa Purok Sambag sa nahisgutang barangay niadtong Martes sa buntag.
Ang nasikop mao sila si Jayron Monterde, alyas “Tyan”, subject sa buy-bust giingong usa ka high value individual ug ang kauban niini nga si George Morales, 32, residente sa Sitio Tabay, Barangay Tunghaan, Lungsod sa Minglanilla.
Nasakmit gikan sa mga suspetsado ang 50 gramos nga shabu nga nibalor tanan ngdto sa P340 mil, buy-bust money, ug nasakmit usab ang usa ka unit nga caliber. 9mm sub-machine gun (KG-9) tulo ka buhing bala, usa ka unit sa kalibre .45 nga pistol uban sa pito ka buhing bala.
Matud ni Police Lieutenant Colonel Epream Paguyod, hepe sa Talisay City Police Station nagkanayon nga si Monterde maoy suspetsado sa pagpamusil sa hepe sa tanod sa Barangay Candulawan niadtong buwan sa Agosto ug Septiyembre niining tuiga.
Ang kapolisan padayon pa nga nihimo sa ilang imbestigasyon kalabot sa pagkasikop sa mga suspetsado.
Sa laing bahin, naangol ang 20-anyos lalaki human kini gipusil sa kaila ra usab niini diha sa Sitio Lahing-Lahing 2, Barangay Mabolo, Siyudad sa Sugbo niadtong Martes sa gabii.
Ang biktima mao si Elgen Robisano, residente sa Ludo Cemetery, Barangay Carreta niining siyudad.
Samtang ang mga suspetsado nailhan kini sa biktima apan wala una gibutyag ang ngalan sanglit padayon pa sila nga gipangita.
Base sa taho sa Mabolo Police Station 4 sa Cebu City Police Office (CCPO) nakadawat sila og tawag gikan sa concerned citizen kalabot sa nahitabong pagpamusil diha sa nahisgutang lugar.
Girespondehan kini sa kapolisan ug pag-abot nila sa dapit nadala na sa ambulansiya ang biktima ngadto sa tambalanan.
Base sa imbestigasyon sa kapolisan nga ang biktima samtang anaa sa dapit kalit niabot ang mga suspetsado ug gipusil kaduha ka higayon ang biktima ug naigo kini sa tiyan. Nakadagan ang biktima ug naabot kini sa Sitio Lahing-Lahing 1 ug nangayo og tabang. (BANAT NEWS)