CEBU, Philippines — Ang Cebu City Council nihangyo sa Cebu Port Authority (CPA) nga palapdan ang ilang mga lakang sa pag-akumodar sa mga senior citizen ug Person With Disabilities (PWDs) sa pantalan.
Gipalabang sa konseho sa siyudad ang resolusyon ni Konsehal Pastor “Jun” Alcover niadtong Miyerkules, Septiyembre 25, 2024 kabahin sa maong hangyo.
Sa iyang resolusyon, si Alcover nagkanayon nga tungod kini sa suwat nga nadawat sa konseho niadtong Septiyembre 11, 2024 gikan sa kanhi mayor sa Dipolog City Edelburgo Cheng kinsa nipadayag sa iyang kalisod kalabot sa nanganaog nga mga pasahero gikan sa Mindanao, Visayas, ug Luzon dinhi sa pantalan sa Sugbo.
Sa maong suwat nangayo og tabang sa konseho si Cheng nga tugotan ang mga taxi cab sulod sa Cebu Port Area aron sayon nalang sa tanang mga pasahero hilabi na sa mga senior citizen, PWDs, ug mga mabdos.
"it is apt for this August Body to request the Cebu Port Authority CPA) to accede and expand its current measures for senior citizens and PWDs", tipik sa resolusyon ni Alcover.
Ang konseho sa siyudad nipalabang sa maong resolusyon nga naghangyo kang CPA General Manager Francisco Comendador Ill nga palapdan ang mga lakang sa pag-akumodar sa mga senior citizens ug PWD pinaagi sa pagpatuman sa tulo ka measure.
Lakip niini mao ang pag-implementar sa senior citizens ug PWD lanes sa CPA passenger terminal nga mahimong accessible sa wheel chairs.
Usa ka taxi lane alang sa mga senior citizen ug PWDs nga nahimutang duol sa CPA vicinity ug sa pagtukod ug senior citizens ug PWDs assistance desk.
Gikataho nga niadtong Septiyembre 20, 2024 ang konseho sa Dakbayan sa Sugbo niawhag usab sa CPA sa pagbutang og accessible nga pampublikong transportasyon diha sa pantalan. —/BDB (BANAT NEWS)