Armado nakigpinusilay sa mga polis napatay

CEBU, Philippines — Patay ang usa ka armadong lalaki human kini misukol sa kapulisan nga niresponde sa may Sitio Mahogany, Barangay Jagobiao, Mandaue City kaadlawon sa adlaw nga Lunes, Septiyembre 23, 2024.

Ang nakalas naila nga si Anthony Abasoto, residente sa Sitio Lourdes, Barangay Jagobiao.  Ang kapulisan uban sa tanod sa barangay Jagobiao nitubag sa alarma may kalabutan sa giingong armado nga tawo.

Pag-abot sa maong dapit inay mosanong ug mokooperar sa mga polis giingong gipamusil ang mga otoridad.

Tungod niini, mibawos sa pagpusil kaniya ang mga polis hinungdan nga kini napusilan ug nakabsan sa kinabuhi.

Ang mga emergency medical personnel sa barangay dali untang mitabang kaniya apan nakabsan gyud kini sa iyang kinabuhi

Ang kapulisan padayon pa nihimo sa ilang imbestigasyon may kalabutan sa maong insidente .Nasakmit sa kapulisan gikan sa namatay ang duha ka armas nga revolver ug mga bala niini. (BANAT NEWS)