CEBU, Philippines — Unom ka mga lungsod ug siyudad sa primero distrito sa Probinsya sa Sugbo ang nakadawat og sumatotal P18 milyones nga subsidiya gikan sa Kapitolyo.
Ang maong kantidad gamiton sa mga LGUs alang sa mga planong ipatuman nga proyekto sa imprastraktura.
Si Gobernador Gwendolyn Garica uban nila ni kongresista Rhea Gullas, ang mitunol sa cheke ngadto nila ni Carcar City Mayor Patrick Barcenas, Naga City Mayor Val Chiong, San Fernando Mayor Mytha Canoy, Sibonga Mayor Lionel Bacaltos, Talisay City Councilor Danny Caballero, ug Minglanilla Vice Mayor Lani Peña.
Ang matag LGU nakadawat og tag P3 milyones gikan sa Probinsya atol sa gipahigayon nga Caravan of Services didto sa dakbayan sa Carcar niadtong September 21.
Gawas sa maong tabang pinansyal, ang maong mga LGUs nakadawat usab og 100 ka pares sa tsinelas gikan sa Department of Interior and Local Government ug sa Kapitolyo.
Lakip usab ang mga gagmay pa nga puno-an sa prutas, utanon, seedlings, ug indemnity checks alang sa agrifishery insurance beneficiaries.
Atol sa caravan of services, nagkadaiyang ahensya sa gobyerno ang mipadangat usab sa ilang programa ug serbisyo ngadto sa mga residente maong distrito.
Apil sa nisalmot sa maong kalihokan mao ang Department of Interior and Local Government, Department of Social, Welfare, and Development, Department of Labor and Employment, Department of Trade and Industry, Department of Environment and Natural Resources, Department of Agriculture, Bureau of Fire Protection, Philippine Navy, Philippine Coast Guard, Professional Regulations Commission, Social Security System, Commission on Elections, Philippine Crop Insurance Corp., Government Service Insurance System, Kadiwa ng Pangulo pop-up stalls, Philippine, Health Insurance Corp., Land Transportation Office ug Integrated Bar of the Philippines-Cebu. (BANAT NEWS)