CEBU, Philippines — Andam nga moasistar ang kapitan sa Barangay Candulawan, sa Dakbayan sa Talisay kun ugaling motahan ang nipusil sa ilang hepe sa barangay tanod nga si Fidel Torion. Si kapitan Josefina Concial nibutyag nga makapila na sila kahigayon nga nakig alayon sa pamilya ni Jeron Monterde alyas Tiyan aron mosurender. Apan semana nalang ang milabay wala pa gyud kini madakpi.
Matud pa ni Concial usa sa ilang konstitwenti si alyas Tiyan busa siya nihangyo nga malinawon kini nga motahan aron ang kabalaka sa mga residenti sa ilang barangay mahupay.
Si alyas Tiyan nibahad sa mga tanod nga hutdon og pamatay human ang iyang igsuon napatay sa usa sa mga tanod.
Niadtong miaging buwan, gipusil ni alyas Tiyan si Torion apan wala makalapos ang bala sa lawas niini.
Apan sa ikaduhang higayon iya nasab nga gibirahan si Torion diha mismo sa atubangan sa barangay hall nga naa ang presensya sa katawhan.
Nagkanayon si Concial nga andam siya nga moabag sa pag surrender ni alyas Tiyan aron masiguro ang iyang kaluwasan. (BANAT NEWS)