Plete sa barko gikan Hagnaya Port padulong sa Santa Fe giminusan

CEBU, Philippines — Sugod karong Oktubre 1, makabarato na ang mga pasahero gikan sa Hagnaya Port sa lungsod sa San Remigio padulong sa Santa Fe sa isla sa Bantayan human nga gipaubsan ang pletehan sa mga barko nga mobyahe sa maong rota.

Sumala sa Kapitolyo moabot sa P5 ngadto sa P29 ang pagmenus sa pletehan ug kini nakab-ot human sa tigom ni Gobernador Gwendolyn Garcia uban ang mga stakeholders sama sa Maritime Industry Authority (MARINA) regional director Annabell Llagas, Madridejos Mayor Romeo Villaceran, Santa Fe Mayor Ithamar Espinosa, ug tag-iya sa Super Shuttle nga si Paul Rodriguez.

Ubos sa bag-ong pletehan sa barko, ang Island Shipping mipaubos sa plete gikan sa P300 ngadto na lang sa P295 sa usa ka byahe o one way samtang ang Super Shuttle, gikan sa P359 nga plete mahimo na lang nga P330.

Matud ni Llagas nga daghan ang ilang nadawat nga hangyo gikan sa mga pasahero nga kon mamahimo paubsan ang plete.

Si Mayor Villaceran nagkanayon nga dako ang matabang niini sa mga mopadulong sa isla ilabina ang mga tinun-an nga makabenipisyo sa barato nga pletehan. Ang Bantayan Island usa sa mga sikat nga tourism destinations sa lalawigan  dili lang sa mga lokal nga bisita apil na usab sa mga langyaw.  Niadtong Agosto, gilusad usab ang commercial flight gikan sa Mactan Cebu International Airport (MCIA) padulong sa isla diin ang byahe ka duha matag semana. (BANAT NEWS)