CEBU, Philippines — Gimando ni Police Regional Office(PRO)-7 Director Brigadier General Anthony Aberin sa tanang police units sa Central Visayas sa paglusad og regionwide manhunt operation batok sa suspek sa paglugos ug pagpatay sa 18-anyos nga tinun-an sa grade 12 sa sulod sa lodging house sa Barangay Poblacion, dakbayan sa Toledo.
Nagkanayon si Police Lieutenant Colonel Gerard Ace Pelare, tigpamaba ni PRO-7 Regional Director Brigadier General Anthony Aberin nga ilang gikondenar ang pagpatay sa biktimang tinun-an sa Buanot National High School.
Ang suspek giila nga si Lorben Cabugsan Larot nga nagpailang alyas Richard Cabugsan diha sa Facebook diin sila nagkaila sa biktima.
Gimonitor ang ang tanang exit points sama sa pantalan sa Sugbo ug gipakatap na sab ang hulagway sa suspek aron kini madakpan.
Matud pa nga nakuha gyud ang dagway sa suspek diha sa CCTV footage sa pagsulod sa maong lodging house. Gisusi na sab sa kapulisan sa Toledo City ang Facebook Account sa biktima ug gitugyan kini sa Regional Anti-Cybercrime Unit-7 aron makakuha og dugang impormasyon nga makatabang sa imbestigasyon.
Nasayran nga niadtong Huwebes sa udto, Septiyembre 19, 2024 nananghid ang biktima nga molakaw may magpa practice og sayaw.
Gumikan kay naanad na sila nga kung mananghid molakaw uban sa iyang classmates dili na sila magsukit-sukit.
Wala sila mahibawo nga naay kakita nga usa ka lalakeng naila-ila sa biktima sa Facebook.
Naalarma na ang pamilya sa biktima kay pagkagabii wala na nauli hinungdan nga gigamit ang laing account sa biktima ug gi-message ang mga classmates kinsa miingon nga wala madayon ang practice. (BANAT NEWS)