Babaye gipusil patay samtang nagduwa og online game sa cellphone

CEBU, Philippines — Patay ang usa ka babaye human kini pusila samtang nagtalikod sa duha ka suspetsadong lalaki niadtong Martes sa gabii diha sa Sitio Kasagingan, Barangay Guadalupe, Dakbayan sa Sugbo.

Ang biktima mao si Baby Lyn Baclayon Gabutan alyas “Bingbing”, 40-anyos, residente sa naasoy nga dapit ug kanhi Overseas Filipino Worker (OFW) ug gikatahapan nga usa ka asset.

Base sa nakuha sa footage sa closed circuit television diha sa lugar sa wala pa ang pagpamusil ang biktima nagtungko kini nagduwa og online game sa iyang cellphone duol sa piso wifi.

Kalit lang nitungha ang duha ka lalaki nga parehong nagsul-ob og kalo ug usa kanila ang nagsul-ob usab og puwa nga jacket, green t-shirt, maong nga short pants ug nagtsinelas samtang ang kauban niini nagsul-ob og gray nga jacket, pink short pants, nagdala og itom nga bag ug nagtsinelas usab.

Giingong human masuta sa mga suspetsado nga ang biktima maoy ilang target gipusil dayon nila kini sa ulo hinungdan sa pagkahagba sa naulahi diha sa yuta.

Human sa pagpamusil daling nisibat ang mga suspetsado.

Ang Guadalupe Police Station sa Cebu City Police Office pinangulohan ni Police Major Miles Damoslog nilusad dayon og hot pursuit operation.

Kagahapon sa alas 5:00 sa buntag nadakpan sa kapolisan ang mga suspetsado sa Sitio Manga ug Sitio Kadasig Phase 3, Barangay Tisa, Dakbayan sa Sugbo.

Ang mga suspetsado mao si alyas “Ace”, 28-anyos, residente sa Sitio Manga giingong mao kini ang nilili ug nisenyas ug si alyas “Rolly”, 27, nagpuyo sa Sitio Kadasig Phase 1 maoy nipusil sa biktima.  Matud ni Damoslog nga sa ilang pasiunang imbestigasyon kalambigitan sa ilegal nga drugas ang motibo sa krimen.

"Probably baka involved din sa drugs at yun din yung mga naririnig namin thru interview pero hindi ma-confirm talaga, maco-confirm lang natin yan kung mag-cooperate na itong dalawa na nahuli", ni Damoslog pa.

Nailhan sa kapolisan ang mga suspetsado pinaagi sa CCTV footages diin nahibaw-an nila ang gisul-ob nga sinina niini, gitas-on ug adunay mga saksi usab nga positibong niila sa mga suspek.

Ang mga suspetsado nangangkon nga unang higayon nila ang paghimo sa maong krimen samtang wala gisalikway sa kapolisan nga posibleng mga gun-for-hire ang duha.

Ang kalibre .45 nga pistola nga gigamit sa pagpamusil sa mga suspetsado ngadto sa biktima ang wala ma-recover sa kapolisan diin giingong gilabay kini sa mga suspetsado apan na-recover sa kapolisan ang mga gisul-ob sa duha dihang gihimo nila ang krimen. (BANAT NEWS)