Gealon: Pasudla ang PUJ sa pantalan

CEBU, Philippines — Gi-awhag ni Konsehal Rey Gealon ang Cebu Port Authority nga tugotan ang pampublikong mga sakyanan nga mobiyahe sulod sa mga pantalan.

Ang maong awhag ni Gealon nitumaw human nakadawat og mga reklamo nga giingong layo kaayo og baktason sa mga pasahero nga mokanaog gikan sa mga barko nga modunggo dinhi sa siyudad.

Gawas pa niini, adunay mga taho nga adunay mga pasahero nga nabiktima sa mga mapahimuslanon nga mga taxi driver nga anaa nag-atang sa gawas sa pantalan ilabi na og magnihit ang masakyan.

Atol sa privilege speech ni Gealon, usa sa mga reklamo nga iyang nadawat mao ang gikan sa kanhi mayor sa Dipolog City nga si Edelburgo Cheng nga niabot dinhi sa Sugbo niadtong Septiyembre 11, 2024.

Ang konseho sa siyudad niawhag ngadto sa mga ahensiya sa kagamhanan sama sa  Cebu City Transportation Office, traffic enforcement unit sa  Philippine National Police ug  Land Transportation Franchising and Regulatory Board nga mosusi kabahin sa maong reklamo nga giingong adunay taxi driver nga magpasakay ra kong pakyaw.  Nunot niini, giawhag sa konseho si Acting Cebu City Mayor Raymond Alvin Garcia nga tukion kining maong isyu uban sa Cebu Port Authority.  Buot usab sa konseho nga ibalik ang karaan nga “transport provision scheme” sa mga terminal diha sa pantalan.

Ang CCTO nimando usab kini sa konseho nga nga dumalaon og tarong ang trapiko gawas sa mga pantalan aron hapsay ang kahimtang sa maong dapit. (BANAT NEWS)