Polis naangol sa pinusilay

CEBU, Philippines — Samdan ang usa ka polis human nakigpinusilay sa duha mga armadong lalake diha sa Tagotago Beach, Barangay Cotcot, Lungsod sa Liloan niadtong Miyerkules sa gabii.

Ang naangol mao si Police Corporal Ian Lagnason, 30, nadestino sa Liloan Police Station kinsa luwas na hinuon ang kahimtang sa tambalanan gikan sa samad pinusilan sa iyang likod.

Samtang ang mga suspetsado nailhan na sa kapulisan residente ra sab maong dapit.

Sa report sa Liloan Police Station usa ka walk-in complainant ang nidangop sa Police Station kay nangayo og tabang labot sa pagpang-harass sa usa sa mga suspetsado.

Giingong magpasingit ang suspek unya magpakita sa armas.  Niresponde dayon ang lima ka intel operatives sa police station apan pag-abot sa lugar giingong kalit silang gipamusil sa mga suspek hinungdan nga naigo si Lagnason.

Sa pagbawos sa kapulisan dali-daling nangaikyas ang mga suspetsado. Nasayran usa sa mga suspek daghan na og kaso sama sa drugas ug sugal. (BANAT NEWS)