Upat sikop sa managlahing buy-bust operation sa siyudad
CEBU, Philippines — Duha ka managlahi nga anti-illegal drug operations ang gihimo sa Philippine Drug Enforcement Agency (PDEA)-7 niadtong Agosto 20, 2024 nga miresulta sa pagkasikop sa upat ka drug personalities apil na ang Regional Target-listed individual.
Niadtong Martes sa hapon ang mga operatiba sa PDEA-7 Regional Special Enforcement uban ang PRO-7 Regional Intelligence Unit-7 nagpahigayon og buy-bust operation sa Sitio Sto. Niño, Barangay Quiot, Siyudad sa Sugbo.
Miresulta kini sa pagkasikop sa subject sa operasyon nga si Christopher Cansancio, alyas Okoy, 40 anyos, wala'y trabaho ug nalista sa PDEA-PNP Regional Target.
Nasakmitan ang suspetsado og duha ka putos sa gituohang shabu nga nitimbang og 10 gramos ug mobalor og P68,000 ug buy-bust money.
Si alyas Okoy gipaubos sa unom ka buwan nga case build up ug giingong makabaligya og 50 ngadto sa 100 grams sa gituohang shabu.
Samtang nasuta nga una nang nakahimo og buy-bust operation ang laing team uban ang CCPO Station 11 sa Sitio Isla Alegre, Barangay Basak San Nicolas, Siyudad sa Sugbo nga miresulta pagguba sa drug den ug pagdakop sa tulo ka indibidwal.
Nasikop sa operasyon ang subject ug drug den maintainer nga si Jobal Rodilias alyas Sadam, 43 anyos, wala'y trabaho, ug duha ka drug den maintainer nga sila si Rogen Teleron, 31 anyos, wala'y trabaho ug Jose Ocañada Lariosa Jr. III, 29 anyos, construction worker.
Gipaubos nila kini og usa ka buwan nga case build up ug nasuta nga maka dispose kini og 20 gramos nga drugas kada semana.
Nakuhaan ang suspect og lima ka putos sa gituohang shabu nitimbang og 12 gramos ug nagkantidad og P81, 600, upat ka empty sachets nga dunay residue sa shabu, buy-bust money, kwarta nga P180 nga gituohang halin sa illegal nga drugas ug mga nagkalain-laing drug paraphernalia.
Ang mga ebidensya nga nasakmit gisumetir sa laboratory alang sa chemical analysis ug proper disposition.
Kasong kalapasan sa Republic Act 9165 ang ipasaka batok sa mga suspetsado. (BANAT NEWS)
- Latest
