Homeowners sa 93-1 naglaom nga masulbad na ang isyu

CEBU, Philippines — Malaumon ang mga homeowner nga nagpuyo ubos sa Provincial Ordinance 93-1 nga makaangkon na og kasulbaran sa isyu kabahin sa seguridad sa pagbaton og kaugalingong luna pinaagi sa tabang sa kagamhanan sa Dakbayan sa Sugbo ug sa Probinsiya sa Sugbo.

Mapasalamaton ang sekretarya sa 93-1 Movement nga si Eulane Quiros ngadto kang Acting Cebu City Mayor Raymond Alvin Garcia gumikan sa pakigtambayayong niini sa iyang iyaan nga si Gobernadora Gwendolyn Garcia aron mahatagan ang mga apektadong mga tag-iya sa balay og kahigayonan nga  makabaton og seguridad sa maong mga luna.

Nasayran nga moabot na ngadto sa 50 ka tuig ang maong problema mahitungod sa walay kasiguradohan nga legal nga estado sa luna.

Niadtong Agusto 8, 2024,  nakighimamat sila si Gobernador Garcia ug Acting Mayor Garcia ngadto sa kapin 5,800 ka lumulupyo sa 93-1 aron nga mahatagan na og deadline ang pagsumiter sa ilang loan applications ngadto sa Home Development Mutual Fund (Pag-IBIG).

Atol sa maong tigom gi-awhag ni Gobernador Garcia ang Pag-IBIG sa paghimo og special guidelines alang lang sa mga lumulupyo sa lote sa 93-1.

Gitataw sa gobernadora nga ang mga lote nga gipanag-iya sa Kapitolyo dili mahimong direktang ibalhin ngadto sa beneficiaries kon dili makadawat sa gigahin nga pundo gumikan kay supak kini sa balaod.

Giangkon ni Quiros nga dakong hagit usab sa iyang mga kauban nga mga homeowner ang mga rekisitos sa Pag-IBIG alang sa housing loan.

Samtang si Atty. Ronald Anthony “Butch” Librando, executive director sa DWUP nipasalig ngadto kang Quiros ug sa ubang 93-1 lot occupants nga naningkamot ang siyudad aron nga masolusyonan ang maong problema.

Matud pa ni Librando nga specific nga nimando si Acting Mayor Garcia ngadto kaniya ug sa opisyales sa dakbayan nga in-charge sa maong isyu sa 93-1 nga tabangan ang mga tag-iya sa balay sa ilang dokumento aron mas mapadali ang pagproseso niini. (BANAT NEWS)