Mga Sugboanong artista pasidunggan
CEBU, Philippines — Pasidunggan sa kagamhanan sa Dakbayan sa Sugbo ang mga Sugboanong artista gikan sa nagkadaiyang natad pinaagi sa Sugboanong Bahandi Awards karong Agosto 27, 2024.
Kini human naaprobahan sa konseho sa siyudad ang sugyot nga pasidunggan ang walo ka artista gikan sa nakadaiyang natad karong tuiga.
Base sa taho sa Public Information Office sa siyudad nga ang mga Sugbuanong artista nga pasidunggan karong tuiga nagbase kini sa rekomendasyon sa Cultural and Historical Affairs Commission (CHAO).
Ang mga pasidunggan mao ang duha ka showbiz icons nga sila si Asia’s timeless diva Maria Teresa Magdalena Abellare Llamedo-Crusata kinsa mas naila sa kinabag-an nga si “Dulce” ug ang beauty queen kinsa nahimong sikat nga artista sa kaulohan nga si Pilar Pilapil.
Napili si Dulce nga usa sa mga hatagan og award tungod kay nakahatag kini og dakong epekto sa industriya sa musika sa nasud, samtang si Pilapil hatagan usab og award tungod sa iyang talagsaon nga mga pasundayag sa industriya sa pelikula.
Hatagan usab og award sa natad sa musika ang iladong piyanista nga si Ingrid Sala Santa Maria.
Lakip usab sa pasidunggan si Philippine Sports Commissioner Edward Hayco alang sa iyang mga bililhong kontribusyon sa natad sa sayaw.
Ang fashion designer nga si Philip Rodriguez pasidunggan usab ubos sa natad sa fashion, samtang ang pintor nga si Celso Pepito pormal usab nga ilhon ubos sa Visual Arts, ug si Dr. Orlando Magno sa natad sa teatro.
Ang Sugboanong Bahandi Awards gihatag kini sa kagamhanan sa Dakbayan sa Sugbo isip pag-ila sa mga artista sa nagkadaiyang natad lakip na sa visual arts, performing arts, media arts, music, sayaw, theatre arts ug uban pa nga nakahimo og malungtarong epekto sa kadaghanan ug nakahatag og dakong dungog sa dakbayan.
Ang mga kanhi nakadawat sa maong pasidungogmao sila si Resil Mojares, Nicolas Pacaña, Jose "Kimsoy" Yap, Romulo Galicano, Kenneth Cobonpue, ug si kanhi Monsignor Rody Villanueva.
Ang umaabot nga awarding ceremony magsilbi kini nga usa sa mga highlight sa Cebu City Arts Month. — /BDB (BANAT NEWS)
- Latest