Honorarium sa BHWs sa Cebu City gisugyot nga patas-an

CEBU, Philippines — Usa ka lokal health official sa Dakbayan sa Sugbo nisugyot nga patas-an ang honorarium sa barangay health workers.

Si Altea Racuya-Lim, BHW coordinator sa Cebu City Health Department nagkanayon nga kapin sa 900 ka BHWs ang nagtrabaho gikan sa 80 ka barangay sa siyudad.

“Kinahanglan na gyud nato i-increase ang honorarium sa mga BHWs kay 24/7 man gud ni sila”, matud ni Lim pinaagi sa Sugboanon Channel. Matud ni Lim nga nagkadaghan ang trabahuon sa BHWs ug bisan pa nga mas dako ang kita sa mga BHW sa dakbayan itandi sa ilang mga katugbang sa ubang mga dapit sa Central Visayas apan ang P7,500 nga honorarium dili gihapon paigo. Ang sugyot sa local health officials nga gikan sa P7,500  himuong P10,000 ang honorarium. Gibutyag ni Lim nga gisugyot na niya kini kaniadto kang kanhi konsehal Antonio Cuenco, Sr. apan wala kini mapatuman human kini nipanaw tungod sa COVID-19 ug subli niya kininmg gisugyot kang Acting Cebu City Mayor Raymond Alvin Garcia. — /BDB (BANAT NEWS)