Kapin 10 ka barangay gustong ma-drug cleared
CEBU, Philippines — Sobra napulo ka mga barangay sa Dakbayan sa Lapu-Lapu ang nagtinguhang madeklarar nga drug cleared.
Ang maong mga barangay niduso na sa mga rekisitos ug dokumento alang niini.
Sumala pa ni Mayor Junard "Ahong" Chan, 17 ka mga barangay diin duha niini ang gikan sa isla sa Olango ang ni apply na sa Regional Oversight Committee nga gilangkoban sa PDEA, PNP, DILG ug Department of Health.
Sumala pa ni Chan, adunay 30 ka barangay ang siyudad ug napulo na niini ang drug cleared ug usa ang drug free barangay.
Bag-ong gideklarar nga drug cleared ang Pangan-an, Caubian ug Kalawisan.
Ang mayor padayon niawhag sa mga opisyal sa barangay nga palig-onon pa ang ilang kampanya batok sa ilegal nga drugas.
Sa pikas bahin, ang Regional Police Drug Enforcement Unit(RPDEU) sa Police Regional Office(PRO)-7 nakasakmit og mga pinaketeng gituohang shabu atol sa buy-bust operation sa Tres Borces Extention, Sitio San Vicente, Barangay Mabolo, siyudad sa Sugbo pasado alas 9 sa gabie sa adlaw'ng Biyernes, Agosto 2, 2024.
Nadakpan sa operasyon ang usa ka Raymond Almacin Bongo, 49,residente sa Sitio Tabok, Barangay Maslog, Dakbayan sa Danao.
Nakuhaan kini og 125 gramos sa gituohang shabu nga nagkantidad og P750 mil.
Sa impormasyon sa kapulisan giingong kuhaon sa suspetsado ang illegal nga drugas sa dakbayan sa Talisay ug itagak sa iyang mga tawo sa nagkalainlaing dapit.
Nasuta nga maka dispose kini og 200 grams kada semana.
Nabilanggo na sab kaniadto ang suspetsado gumikan gihapon sa kalambigitan sa ilegal nga drugas.
Kasong kalapasan sa Republic Act 9165 ang kasong ipasaka batok sa dinakpan. (BANAT NEWS)
- Latest
