CEBU, Philippines — Kasamtangan nga gipahiluna sa City Holding and Accounting Section sa Cebu City Police Office ang PNP personnel nga nadestino sa Tourist Police Unit nga nag-viral dihang gi-post ni Teacher Athena, miyembro sa LGBT community ang iyahang video nga wala siya pasudla sa Basilica Minore del Santo Niño tungod kay nag-short pants siya ug wala usab dawata ang iyahang passport dihang gipangayoan og valid ID.
Si Police Lieutenant Colonel Janette Rafter, deputy city director for administration sa Cebu City Police Office nagkanayon nga aduna sila’y gipuli nga laing PNP personnel sa simabahan aron mobantay sa seguridad tungod kay ang Basilica Minore del Santo Niño usa sa mga suroyanan ilabi na sa mga turista lokal ug langyaw.
Sayo pa, girelibohan ang maong polis human kini nalambigit sa viral video isip kabahin sa gihimong imbestigasyon sa maong hitabo.
Gipaneguro ni Rafter nga patas ang ilang himuong imbestigasyon.
Sa oras sa pagsuwat niining balita wala pa mopagawas og pamahayag ang Basilica Minore del Santo Niño kalabot sa isyu ug wala usab moluwat og pamahayag ang gwardiya ug polis nga nalambigit niini. (BDB) BANAT NEWS