Extension building sa Guba Community Hospital gibuksan na

CEBU, Philippines — Si Acting Cebu City Mayor Raymond Alvin Garcia nangulo sa blessing ug ribbon cutting sa extension building Guba Community Hospital kagahapon sa buntag uban sa opisyales sa siyudad ug department heads, opisyales sa barangay ug mga bisita.

Ang maong kalihokan gisugdan kini sa usa ka Santos nga Misa ug gisundan dayon sa blessings sa maong pasilidad ug cutting sa ribbon dayon ang hamubo nga programa. Ang maong facility gisugdan kini napulo ka tuig ang nakalabay ug nahuman niadtong tuig 2022 apan nilanat pa ug laing duha ka tuig human kini hingpit nga gibuksan ngadto sa katawhan.

Matud ni Dr. Grace Valdez, medical director sa maong tambalanan nga malaomon sila nga mabutangan kini og mga kagamitan nga state of the art sama sa facilities nga bag-ong ulta sound, x-ray ug uban pa. Si Valdez nanghinaot nga mailisan ang pangalan sa Guba Hospital aron aduna kini positibo nga pagtan-aw diin ang pag-ilis sa pangalan nagdepende kini sa opisyales sa barangay, city council ug sa departamento sa panglawas.

Si Dr. Sophia Mancao, assistant regional director sa DOH nagkanayon nga ang pagbukas sa Guba Community Hospital pagpakita kini sa hiniusa nga pagtinabangay sa pagdala sa health care ngadto sa tanang Sugbuanon.

Naglaom si Mancao nga sa dili pa mahuman ang tuig mahimo na kining level 1 facility.

Sa iyang bahin, si Garcia nanghinaot nga dili na transfer station lang ang maong tambalanan apan sinugdanan na kini aron mahimong full blown hospital nga modawat ug motambal sa tanang masakiton.

Si Garcia mapasalamaton sa DOH-7 sa ilang tabang ug nanghinaot nga dili kini  mohunong sa pagpaambit sa ilang tabang ilabi na nga mas aduna kini dakong budget kalabot sa panglawas itandi sa lokal nga kagambahan. (BANAT NEWS)