Tulo naangol sa nasunog nga bodega

CEBU, Philippines — Duha ka bombero ug usa ka sibilyan ang naangol sa dili mominos napulo ka oras nga sunog nga niulbo bodega sa usa ka dakong hardware diha M.J Cuenco Avenue, eskina sa T. Padilla Street, Barangay Tejero ning Dakbayan sa Sugbo, Miyerkules sa gabii.

Alas-7:15 sa gabii adlaw nga Miyerkules nadawat sa mga bombero ang alarma, napawong kini alas-5:02 na sa kaadlawon adlaw nga Huwebes.

Naangol sila si FO3 Donald Densing, 35, nga nangatol ang tuo nga mata human napiska’g gituohang kemikal; napupo sab ang duha ka ngipon ni FO1 Marvin Dumogho human natagak kini sa hagdan ug sibilyan nga si Ryan Dela Cerna, 20, nga nangatol ang nawong human napiskan sab og kemikal. Ang maong sunog nagbilin og P19.2 milyones nga danyos ug 40 ka tawo nga nagtrabaho sa bodega ang naapektahan.

Ang ground commander nga si Supt. Reynaldo Enoc uban sa Investigator FO2 Marie Grace Ambayan padayon pa nihimo sa imbestigasyon sa hinungdan sa pag-ulbo sa maong sunog.

Dali-dali untang nitabang gamit ang fire extinguishers ang mga kasikbit nga establisamento apan paspas ang pagkuyanap sa kalayo sa bodega.

Si suspended mayor Michael Rama miabot sa lugar  ug paglabay og pipila ka oras miabot sab si acting mayor Raymund Alvin Garcia nga nakighinabi sa mga bombero ug tag-iya sa maong bodega ug mibiya dayon. —  IBM BANAT NEWS