Mga POGO-like operation sa Cebu City gipangita

CEBU, Philippines — Walay legal nga operasyon sa Philippine offshore gaming operators (POGOs) sa Cebu City base sa datos nga gihatag sa Business Permit and Licensing Office(BPLO) apan kinahanglang tan-awon kun adunay POGO-like activities.

Nunot kini sa deklarasyon sa pag ban sa POGO dinhi sa nasud atol sa 3rd State of the State of the Nation Address (SONA) ni Presidente Ferdinand Marcos Jr., si Acting Mayor Raymond Alvin Garcia niingon nga walay lisensiyado nga sama niini nga aktibong nag operate sa        dakbayan.

Subay sa datus sa BPLO, dili mominus 40,000 ka mga establisemento ang narehistro sa dakbayan sa Sugbo.

“There is no legal POGO operations here in the city of Cebu...so I hope that is clear," matud pa ni Garcia.

Hinuon si Garcia niingon nga mahimo nilang susihon pag-usab ang mga taho nga posibleng adunay mga kalihokan og “POGO like” sa Sugbo.

Ang chairman ug CEO sa Philippine Amusement and Gaming Corp. (PAGCOR) nga si Alejandro Tengco una nga miingon nga nakadawat sila og mga taho nga adunay mga kalihokan og POGO-like activities sa Central Visayas, partikular na sa Sugbo.

“This is what I can assure you, I am working closely with the PNP and the NBI regarding this matter... wa man gud ta kahibaw gud kung naa ba gyud or dili," matud ni Garcia.

Gikataho usab nga si Interior and Local Government (DILG) Secretary Benhur Abalos Jr. miingon usab nga siya gikatakda nga makigtagbo sa mga local chief executives bahin sa niini.

Dugang pa ni Garcia nga iyang gi-welcome ang DILG secretary nga taposon ang maong problema kung mapamatud-an nga duna gyuy mga POGO/like activities sa dakbayan.

Si Garcia niingon nga ila usab nga susihon ang mga negosyo nga narehistro ubos sa BPO aron masiguro nga dili kini front sa POGO activities. “We will have an inspection,” matud ni Garcia.— IBM  BANAT NEWS