Kontribusyon sa PAGCOR sa Cebu City pausbawan

CEBU, Philippines — Nagkasabot ang mga sakop sa konseho sa Dakbayan sa Sugbo nga usbawan ang bahin sa siyudad sa kita sa Philippine Amusement and Gaming Corp. (PAGCOR) atol sa ilang regular session niadtong Hulyo 24, 2024.

Nagsugod sa P2 milyones ang hatagan sa PAGCOR ngadto sa Dakbayan sa Sugbo isip bugti sa pagtugot niini nga mag-operate ug niadtong tuig 2012 nisaka kini ngadto sa P4 milyones matag tuig.

Si Konsehal Noel Wenceslao, chairman sa Committee on Budget and Finance sa konseho sa siyudad niduso og motion nga nag-awhag sa PAGCOR nga dugangan ang ilang kontribusyon sa Dakbayan sa Sugbo.

Nunot niini, si Konsehal Joy Augustus Young nisugyot usab nga usbawan sa PAGCOR ngadto sa P8 milyones ang kontibusyon niini ngadto sa siyudad.

Gisuportahan kini ni Wenceslao ug giawhag ang Committee on Games and Amusements nga tun-an ang tinuig nga kita sa PAGCOR aron madeterminar ang patas nga kantidad alang sa siyudad.  Si Konsehal Renato Osmeña, Jr., chairman sa Committee on Games and Amusements nibutyag nga ang PAGCOR mokita og P1.3 bilyones matag tuig.

Samtang si Konsehal Phillip Zafra, chairman sa Committee on Public Order niduso usab og resolusyon nga masusi pag-ayo ang ordinansa sa mga gaming sites sa siyudad tungod sa mga reklamo kabahin sa mga menor de edad nga gitugotan nga makasulod. —Gie-Ann N. Tapic, BDB BANAT NEWS