Cebu City motukod og procurement office pagpadali sa mga proseso

CEBU, Philippines — Gilantawo karon sa Dakbayan sa Sugbo and pagtukod og procurement office diha sa city hall aron mapasapasan ang mga proseso human gitumbok sa Commission on Audit (COA) ang pagkalangay sa pagkompleto sa mga proyekto nga gikontrata.

Sa gipahigayong press conference kagahapon si Acting Cebu City Mayor Raymond Alvin Garcia nagkanayon nga ang mga kasagarang gikwestiyon sa 2023 annual audit sa COA gitubag na sa kagamhanan sa siyudad.

Lakip sa mga highlight nga namatikdan sa COA mao ang Construction of Drainage Mains Project nga mokabat ngadto sa P200 milyones nga gi-bid niadtong tuig 2021.

Matud sa COA nga adunay kakuwang sa paningkamot ang siyudad sa pagpaningil sa 15 percent mobilization diin napakyas ang pag-uswag sa design stage sa proyekto.

Si Garcia nagkanayon nga daan na silang gisultihan sa contractor nga magkinahanglan sila og kooperasyon sa Dakbayan sa Sugbo aron mahuman ang desinyo.

Ang contractor nangayo og mga titulo, tax declarations, ug road networks ug uban pa aron masugdan ang civil works apan wala kini mahatag.

“But definitely maningil jud ta nila sa atong advance payment nga atong gibayad nila", padayag ni Garcia.

Si Garcia nagkanayon usab nga kinahanglan nga susihon usab kong kini nga kontrata gi- terminate na.

Base usab sa taho sa COA nga naobserbahan nga ang siyudad kanunay’ng nalangan sa pagproseso sa mga bayad sa mga supplier gikan sa 53 hangtud sa 637 ka adlaw base sa 20 nga sample nga mga transaksiyon kaniadtong tuig 2023.

Kini gumikan sa taas nga mga proseso ug kakulang sa mga kawani nga nagdumala sa inisyal nga evaluation.

Ang COA nirekomendar og mga lakang sama sa pagsusi sa kasamtangan nga proseso ug pagkunhod o pagwagtang sa dili kaayo kinahanglan nga mga lakang o proseso.

Sa iyang bahin, si Garcia nagkanayon nga ang mo process sa procurement sa Dakbayan sa Sugbo mao usab ang mga miyembro sa bids and awards committee (BAC).

Ug ang maong mga sakop sa BAC naggunit usab og laing buhatan diin sila mo-report alang sa adlaw-adlaw nga trabaho. 

Dugang ni Garcia nga gilantaw nila karon ang pagtukod og procurement office nga ang tahas mao ang pag-monitor sa procurement sa siyudad. —  BDB BANAT NEWS