Mga colorum nga sakyanan gipamulta og tag P200 mil

CEBU, Philippines — Human sa pagkasikop sa duha ka taxi driver nga nag-overcharging sa delegado sa Palarong Pambansa, ang Land Transportation Office-7 naka-impound usab og laing duha ka pribadong sakyanan nga nagbiyahe nga walay prangkisa.

Ang LTO-7 nipahamtang og silot ngadto sa maong duha ka drayber nga nadakpan niadtong Hulyo 12 ug 15, 2024 human sa pagpahugot sa operasyon sa maong ahensiya batok sa mga drayber nga nagpa-burot sa ilang presyo sa pletehan ngadto sa delegado sa Palaro.

Matud ni LTO-7 Director Glen Galario nga ang ilang personnel nakaakto sa pag- overcharging sa maong mga draber nga nadakpan gamit ang pribado nga sakyanan.            

Ang maong PUV nag operate kini nga walay prangkisa.

Ang duha ka pribadong sakyanan na-entrap kini sa Dakbayan sa Sugbo ug gipamulta og tag 200 mil tungod sa colorum violation o nagbiyahe nga walay proper authority gikan sa Land Transportation Franchising and Regulatory Board.

Gibutyag ni Galario nga ang duha ka units na-impound na ug ang registered owners sa sakyanan corporate stockholders o directors disqualified na sa pag-operate sa bisan unsa nga public land transportation.

Ang LTO-7 atol sa ilang operation gikan sa Hulyo 9 ngadto sa 16, 2024 o atol sa usa ka semana nga pagpahigayon sa Palarong Pambansa 2024 nakadakop og 504 ka sakyanan gumikan sa nagkadaiyang kalapasan sa trapiko.  Ug niabot sa 14 ka sakyanan ang na-impound tungod sa lain-lain nga kalapasan apil na niini ang pag-operate nga walay proper registration.

Ang ikaduha nga daghan nga kalapasan mao ang 129 ka drayber nga nadakpan tungod kay wala mosunod sa mandatory nga paggamit og seat belts. (BANAT NEWS)