PNP ug PCCAI nigama og MOA alang tabang medical sa kapolisan

CEBU, Philippines — Nagpirmahanay og memorandum of agreement ang Philippine National Police (PNP) ug Philippine-Chinese Charitable Association, Inc. (PCCAI) alang sa tabang medical sa kapolisan niadtong Hulyo 23, 2024 diha sa Chinese General Hospital and Medical Center.

Ang MOA naglakip sa mga probisyon alang sa PCCAI aron mahatagan og pasiunang medical aid ug treatment and tanang police personnel nga nadestino sa Metro Manila nga nakaangkon og mga samad sa pagpahigayon sa ilang katungdanan ug gidala sa PNP didto sa Chinese General Hospital and Medical Center.

Ang ospital maghatag og diagnosis, treatment, surgery, major operations, ug access sa medical nga ekipo ug pasilidad gikan sa pag-admit hangtud sa pag-discharge.

Ang mga naka-recover nga PNP uniformed personnel ma-discharge nga walay bayad sa pagpresentar sa pruweba sa line of duty status ug active PNP membership nga ang bayronon dili molapas sa P1milyon. Si PNP Chief Rommel Francisco Marbil nipaabot sa iyang dakong pasalamat sa Philippine-Chinese Charitable Association, Inc. ug sa Chinese General Hospital and Medical Center sa ilang walay paglubad nga suporta ug pagkamanggihatagon.

Matud niya nga ang padayong panag-uban nila nagpakita sa labing maayong pakigtambayayong sa publiko ug pribadong sektor ug nagtakda kini sa usa ka talagsaong sumbanan kong giunsa paghiusa sa nagkalainlaing mga sektor aron matubag ang mga panginahanglanon sa mga komunidad.

Si Marbil nagkanayon nga ang panglawas sa mga polis mao ang labing mahinungdanon ug ang pag-atiman niini nagsiguro nga makapadayon sila sa ilang epektibong pagserbisyo sa nasud.

Giawhag niya ang tanang PNP personnel nga pahimuslan ang serbisyong medical nga gitanyag ug aktibong moapil sa ilang gipasalig sa ospital sama sa quarterly blood donation drives.

Ang seremoniyas gitambongan usab nila ni Antonio Tan, chairman of the board of the PCCAI, Atty. Benjamin “Benhur” Abalos, Jr., kalihim sa Department of the Interior and Local Government, Kelly Sia, presidente ub CEO sa Chinese General Hospital and Medical Center, ug uban pa. (BANAT NEWS)