Mga ilegalista sikop atol sa managlahing operasyon sa kapolisan

CEBU, Philippines — Dul-an sa P400 mil ang balor sa ginadiling drugas ang nasakmit sa sa kapolisan sa Central Visayas sa ilang usa ka adlaw nga Simultaneous Anti-Criminality Law Enforcement Operations gikan sa Hulyo 23-24, 2024.

Niabot sa 54.20 gramong shabu ang nasakmit atol sa tulo ka operasyon nga gipahigayon sa kapolisan ug lima ka tawo ang nasikop.

Niabot sa 3 mil ka punoan sa fully grown nga marijuana nga adunay nikantidad tanan ngadto sa P368,560 ang nalarot ug nasakmit usab ang 2,000 gramos nga pinauga nga dahon sa marijuana nga nikantidad tanan ngadto sa  P250 mil.

Nunot niini, ang kapolisan nipahigayon og 13 ka operasyon batok sa ilegal nga sugal  diin 18 ka tawo ang nadakpan ug dul-an sa P2 mil nga kwarta nga gituohang pusta ang nasakmit ug 13 ka tawo ang napasakaan og kaso.

Niabot sa 12 ka wanted person ang nadakpan ug usa ang nitahan sa ilang armas atol sa operasyon sa loose firearms.  Ug niabot sa 1,381 ka tawo nga nakalapas sa local ordinance ang nadakpan ug mokabat ngadto sa P738 mil ang multa nga nakolekta.

Samtang ang Lapu-Lapu City Police Office (LCPO) ang nakasakmit og 53.6 gramong shabu nga nikantidad tanan ngadto sa P364, 480  gikan sa duha ka suspetsadong pusher atol sa buy bust operation sa niaging adlaw.

Ang pagkasikop sa duha maoy kabahin sa usa ka adlaw nilang operasyon sa pagsumpo sa ilegal nga mga kalihokan sa maong dakbayan

Sa laing bahin, upat ka tawo kinsa giingong nalambigit sa ilegal nga sugal ug drugas ang nasikop atol sa operasyon sa kapolisan sa Lungsod sa Sogod diha sa Barangay Poblacion.

Ang Sogod Police Station nagpahigayon og operasyon sa Barangay Poblacion sa maong diin nasikop si alyas “Lando”, 48 anyos, residente sa naasoy nga dapit ug nasakmitan og gambling paraphernalia.

Dihang girikisa ang suspetsado sa usa sa mga polis nakuhaan kini 0.05 gramo nga shabu.

Nadakpan usab sa kapolisan sa Lungsod sa Sogod si alyas “Rico”, 43, nagpuyo sa Barangay Poblacion gumikan gihapon sa kalambigitan niini sa ilegal nga swertres.

Samtang ang Dalaguete Police Station, nakasikop si alyas “Eti”, 52-anyos, nagpuyo sa Barangay Poblacion sa maong lungsod ug nakuhaan kini og illegal gambling paraphernalia.

Samtang ang kapolisan sa Lungsod sa Santander nasikop atol sa ilang operasyon diha sa Barangay Bunlan si alyas “Daisy”, 37- anyos, molupyo sa Barangay Looc sa maong lungsod. —Romeo T. Limpangog, Decemay P. Padilla (BANAT NEWS)