Garcia nimando nga paspasan ang socialized housing sa Lorega

CEBU, Philippines — Nihimo og inspection si acting Cebu City Mayor Raymond Alvin Garcia sa socialized housing sa Medium-Rise Building 2 nga nahimutang sa barangay Lorega San Miguel, kagahapon sa buntag adlaw nga Miyerkules.

Kini aron pagsuta sa kasamtangan nga status sa maong building.

Si Garcia nipasabot sa ka importante sa paghuman ug pagpadali sa maong proyekto ilabi na sa construction tungod sa commitment sa siyudad sa pagpalambo sa housing infrastructure aron matubag ang panginahanglan sa komunidad.

Ang MRB project maoy kabahin sa nagpadayon nga paningkamot sa paghatag og malungtaron nga housing solutions ug pagpalambo sa pagpuyo sa mga residente sa Dakbayan sa Sugbo.

Ang MRB 2 sumala pa ni Garcia anaa pa sa 48 percent nga nahuman sa trabaho sukad nga gisugdan ang construction niadtong 2021.

Kauban nga nibisita ni Garcia sa MRB mao ang Barangay Captain nga si Nilo Andrin Dela Cerna, DEPW ug uban pa.

Ang MRB 2 gipaabot nga makabenipisyo sa gatus kapin ka pamilya diin hatagan og priority mao ang mga apektado sa sunog ug kadtong naa sa 3meter easement.

Si Garcia gusto nga papaspasan ang maong proyekto ilabi na dul-an sa tulo ka tuig na ang maong proyekto aron adunay mapahimutangan sa mga way kapuy-an.

Gusto usab sa acting mayor nga adunay ordinansa kung kinsa ang priority sa pagpuyo sa maong MRB2 ug dili usab kini ibaligya sa beneficiary.

Ang maong proyekto giingon nga gipundohan sa siyudad og P227milyones. (BANAT NEWS)