PAGASA: Bugnaw nga panahon masinati sa mosunod nga mga bulan, mag-amping
CEBU, Philippines — Gipahibalo sa Philippine Atmospheric, Geophysical and Astronomical Services Administration (PAGASA) nga nagsugod na ang pagbugnaw sa panahon ug hayan maporma na ang La Niña karong sunod buwan.
Sa ilang obserbasyon ug pag-analisar sa lakaw sa panahon, nasuta nga nagsugod na ang pagbugnaw sa temperatura sa “sea surface” sa central and eastern equatorial Pacific (CEEP).
“Most climate models combined with expert judgement suggest 70% chance of La Niña forming in August-September-October (ASO) 2024 season and likely to persist until the first quarter of 2025,” sumala sa press release sa PAGASA.
Ang La Niña mao ang usa ka phenomena kun diin mas bugnaw ang panahon gikan sa average o kasarangan nga temperatura sa sea surface o kadagatan.
Tungod sa La Niña, taas ang kahigayonan nga modaghan ang mga bagyo nga magdala og grabeng pagbunok sa ulan sa mga mosunod nga mga bulan.
Subay niini mapaabot nga nga dunay mga pagbaha, pagdahili sa yuta sa pipila ka mga lugar. Giawhag nila ang mga hingtungdan nga ahensya sa gobyerno ug ang publiko nga moapil pud sa pagmonitor ug mohimo og mga paagi aron malikayan nga adunay mga insidente nunot sa gipaabot nga kanunay nga pag-ulan. (BANAT NEWS)
- Latest