5,000 ka OFW nakabenipisyo sa information caravan sa OWWA

CEBU, Philippines — Malamposong gilusad sa Overseas Workers Welfare Administration (OWWA)-7 ang “Information Caravan on OWWA’s Programs and Services and Financial Literacy” sa unang bahin sa tuig 2024 nga nakabenepisyo sa kapin 5,000 ka Overseas Filipino Workers (OFWs) ug sa ilang mga pamilya.

Ang beneficiaries gikan sa pito ka siyudad ug munisipalidad sa Probinsiya sa Sugbo  diin unang gipahigayon ang programa.

Ang mga lokalidad naglakip sa Lungsod sa Alcantara nga adunay 210 ka partisipante; Lungsod sa Pinamungajan nga adunay 1,157 ka partisipante; Dakbayan sa Toledo, 1,500 ang partisipante; Lungsod sa Santa Fe, 450 ang partisipante; Lungsod sa Barili nga adunay 900 ka partisipante; ug Dakbayan sa Bogo nga adunay 1,200 ka partisipante.

Ubos sa direktiba ni OWWA-7 Director Reynaldo Jacalan nga ang Cebu Family Welfare Officers nagpasiugda sa usa ka misyon aron direktang madala ang mga programa ug serbisyo sa OWWA sa mga pamilya sa OFW sa barangay level.

Ang buhatan nagpahigayon og mga orientation sa nagkalain-laing mga programa ug serbisyo nga naghatag og financial literacy training ug nagpahigayon og diyalogo aron matubag ang mga pangutana sa mga partisipante mahitungod sa pag-access sa mga programa sa OWWA.

Gibutyag ni Jacalan nga dul-an sa 50 ka OFW organization ang naumol nga nagtumong sa pagpalambo sa panaghigalaay ug pagpasiugda og long-term nga kolaborasyon sa mga OFW.

Ang maong mga organisasyon gipaila sa Tulong PUSO Program nga naghatag og suporta sa capitalization sa mga grupo nga adunay mga kolektibong tumong sa negosyo ug nagpasiugda sa mga programa gikan sa mga kauban nga ahensiya sa gobiyerno nga gidesinyo aron mapauswag ang mga kapabilidad sa mga organisasyon ug mapalig-on ang ilang mga paningkamot sa negosyo.

Kini nahimong posible pinaagi sa pagtambayayong sa Public Employment Services Office (PESO), OFW Help Desks, ug suporta sa mga siyudad ug munisipyo nga nalambigit. (BANAT NEWS)