Dagkung bato nangatagak diha sa Brgy Campo 4

CEBU, Philippines — Nabalda ang dagan sa mga sakyanan diha sa sitio Crossing, Barangay Campo 4 sa siyudad sa Talisay kagahapon sa buntag gumikan sa nagpasad nga mga dagkung bato nga naligid gikan sa ibabaw nga bahin sa nahisgutang dapit.

Ang mga bato nikuha og usa ka lane sa karsada hinungdan nga hinay ang dagan sa trapiko sa lugar.

Miresponde gilayon sa lugar ang mga sakop sa barangay disaster ug City of Talisay-Traffic Operation Development Authority (CT-TODA) aron hawanan ang karsada. Hinuon way gikatahung mga tawo ug mga sakyanan nga naatlan sa pagkaligid sa mga bato.

Ang mga sakop sa CT-TODA mao ang naghinay-hinay sa paghawan sa mga bato samtang ni asistar sa dagan sa trapiko.

Subay niini giawhag ang mga motorista nga maghinay-hinay ug magmabinantayon samtang moagi sa mga bukirang barangay sa Talisay sama sa Manipis, Campo 4 ug Jaclupan. Apan aron masiguro ang kaluwasan gisugyot sa CT-TODA nga mas maayo nga mangita na lang gyud og laing dalan nga kaagian ilabi na kun ting-uwan nga sagad moresulta sa pagdahili sa yuta. (BANAT NEWS)