Presidente Marcos motambong sa pagbukas sa Palarong Pambansa

CEBU, Philippines — Gipaabot nga nia si President Ferdinand "Bongbong" Marcos Jr sa Dakbayan sa Sugbo ugmang adlawa Martes alang sa duha ka mga dagko nga kalihukan.

Tambongan sa Presidente ang pagbukas sa Palarong Pambansa 2024 nga ipahigayon sa siyudad sa Sugbo kinsa maoy host sa dako nga kalihukan sa paugnat sa kusog.

Lakip sa iyang tambongan ang pagbukas sa Manufacturing Plant nga nahimutang sa Northern Cebu.

Subay niini gipangandaman na sa dakbayan ug Probinsya sa Sugbo ang pag-abot sa presidente alang sa maong kalihukan.

Si Dr. Adolf Aguilar, Assistant School's Division Superintendent sa Dep-Ed Cebu City nibutyag nga mapaabot gayud ang higpit nga seguridad sa pagbukas sa Palarong Pambansa 2024 tungod sa pagtambong sa mga dagkong opisyal sa nasud.

Gitug-an usab ni Aguilar, adunay daghan pa usab nga nipadala og pahibalo kanila nga mga opisyal sa laing dapit sa Pilipinas aron mag benchmarking ug mag-obserbar sa ilang pagpadagan sa kalihukan sa Palarong Pambansa dinhi sa siyudad. (BANAT NEWS)