Driver nag-sideline og drugas nadakpan
CEBU, Philippines — Wala kaipsot sa mga tinugyanan sa balaod ang usa ka PUJ driver nga giingong nag sideline pagbligya og ilegal nga drugas human kini nadakpan sa buy-bust operation sa Mabolo Police Station 4 sa Cebu City Police Office pasado alas-12 sa kaadlawon kagahapon sa Sitio Sindulan, Barangay Mabolo, Cebu City.
Ang suspetsado nga 47 anyos, residente ra usab sa naasoy nga lugar ug gikonsiderar nga usa ka Regional High Value Individual sa kampanya batok ilegal nga drugas.
Nakuhaan ang suspetsado og 1,005 gramos nga gituohang shabu nga nagkantidad og P6.8 milyones.
Nagkanayon si Police Major Romeo Caacoy Jr., hepe sa Mabolo Police Station 4 nga ang suspetsado tigtagak og illegal nga drugas sa lugar ug sa mga silingan nga mga dapit.
Base sa imbestigasyon nasuta nga maka dispose kini og sobra usa ka kilong shabu kada semana. "Dugay-dugay nani siya na involved aning mao nga illegal nga kalihukan," sigon ni Caacoy.
Palawman sa kapulisan ang gitug-an matud pa sa suspek nga ang mga illegal nga drugas ipahatod ra sa iyahang kaila nga naa sulod matud pa sa prisuhan.
Samtang nasakmit sa Lapu-Lapu City Police Office (LCPO) ang 147.69 gramo nga shabu gikan sa 15 ka mga pusher nga ilang nadakpan sa usa ka semana nga Simultaneous Anti-Criminality Law Enforcement Operation (SACLEO) nga nagsugod niadtong Hunyo 22 hangtod sa Hunyo 28, 2024. Si Police Colonel Ali Baron, director sa LCPO miingon nga base Dangerous Drug Board (DDB) value ang nasakmit nga shabu nagkantidad kini og P1,004, 292.00
Dugang nga nasayran nga ang 15 ka mga pusher nga nadakpan pulos kini mga Street Level Individual nga maoy nahimong resulta sa 11 nila ka mga operasyon sa lainlaing lugar sa dakbayan. (BANAT NEWS)
- Latest
