Advance parties sa Palaro nasugod na og abot

CEBU, Philippines — Nagsugod na sa pagpangabot ang advance party sa mga rehiyon nga mosalmot sa Palarong Pambansa 2024 sa Cebu City.

Si acting Mayor Raymond Alvin Garcia mipahigayon ug ocular inspection adlaw nga Lunes sa mga tulonghaan sa dakbayan nga himoong billeting quarters sa mga delegado sa sunod nga buwan.

Uban ang DepEd Official una nilang gisusi ang Tisa II Elementary School, diin gitan-aw nila ang mga classrooms nga puy-anan sa mga delegado.

Ang acting mayor nitug-an base sa iyang pagsubay sa mga billeting area natagbaw siya sa preparasyon. Matud pa 95 ngadto sa 98 percent na ang trabaho sa external painting sa mga tulonghaan.

Ini’g abot sa mga magtutudlo sa Hulyo 1 ug 2 maka supervise na kini sila sa pagpanglimpyo sa mga tulonghaan aron kun maabot na ang mga delegado hapsay na gyud ang tanan nga ilang kapuy-an.

Nakita sab ni Garcia nga walay problema sa tubig ang mga billeting quarters ug nipasalig usab ang barangay nga motabang sa paghatag og tubig sa mga delegado.

Sa Tisa II Elementary School ilaha usab gipatrabaho ang ilang deep well aron adunay magamit inig abot sa tukmang panahon.

Ang Assistant Division Supt. DepEd Cebu City Dr. Adolf Aguilar nibutyag nga anaa na sila sa final stretch sa ilang preparation.

Matud niya duna nay nangabot nga staff gikan sa nagkadaiyang delegasyon  nga tuyong nanganhi aron pagsusi sa puy-an sa ilang mga atleta.

Ang Tisa Elementary School adunay 70 ka classroom nga gamiton para sa mga delegado  duna say uban nga adto ibutang sa Tisa National High School.

Ang Principal na si Vilma Villaflor, nitug-an ang local school board adunay giandam nga beddings sa mga billeting quarters.

Ang mga unang nangabot mao ang advance party gikan sa Socsargen Region aron hapsayon ang tanan para sa ilang dul-an usa ka libo nilang delegasyon.

Tinguha nila ni Edwin Miranda, Chairman sa advance party sa Region 12 nga mapanindot ang dapit aron mamentinar nila ang ilang ‘standing’ sa labing nindot nga billeting quarter sulod na sa tulo ka higayon pagsalmo nila sa Palarong Pambansa.

Gipadayag ni Miranda, mas maayo gayud adunay koordinasyon sa tulonghaan nga ilang puy-an. (BANAT NEWS)