P3m shabu, armas, nasakmit

CEBU, Philippines — Dul-an sa P3 milyones nga balor sa illegal nga drugas ang nasakmit sa kapulisan sa Cebu City Police Office sa ilahang operasyon batok illegal nga drugas gikan sa Hunyo 17 hangtod sa petsa 23 sa samang buwan tuig 2024.

Ang maong mga ilegal nga drugas nasakmit gikan sa Barangay Tisa, Quiot, Banawa, Inayawan ug Talamban. Gawas sa ilegal nga drugas duna say nakuha nga kalibre 45 nga pistola gikan sa usa sa mga nadakpan sa ilegal nga drugas diha sa Inayawan.

Gawas sa kampanya batok illegal nga drugas apil sab sa gipakusgan sa mga notadong kawatan ug mga pinangita sa balaod.

Sa Mabolo Police Station ug Labangon nakadakop og mga gipasanginlang kawatan nga pirmeng mamiktima sa ilang hurisdiksyon.

Samtang ang Mabolo Police Station nakadakop og 34-anyos nga lalakeng dunay kasong frustrated parricide, murder ug homicide. Gawas niya, duna pay laing napulo ka mga tawo nga naglambigit sa nagkalain-laing krimen ang ilang gidakop.

Matod ni CCPO Director Colonel Ireneo Dalogdog nga bisan paman og nakatututok sila sa Palarong Pambansa wala sila molugak sa kampanya batok sa tanang matang sa kriminalidad sa siyudad.

Kani nga operasyon kabahin sa preparasyon sa CCPO pagsigurong hapsay ug malinawon ang siyudad atol sa pagpangabot sa mga delegado sa maong palaro. (BANAT NEWS)