30 sporting venues ang tutokan sa CCPO

CEBU, Philippines — Karong adlaw’ng Biyernes, Hunyo 28, 2024 ipahigayon ang send-off ceremony alang sa mga mobantay sa umaabot nga Palarong Pambansa 2024 diin anha kini himoon sa South Road Properties(SRP) Sinulog Ground.

Matod ni Police Colonel Ireneo Dalogdog, City Director sa Cebu City Police Office(CCPO) nga apil sa motabang og bantay sa kalihukan mao ang Joint Task Group sa Philippine Army apil na sab ang mga force multipliers.

Sumala pa sa CCPO, 33 ka venues sa mga nagkalain-laing duwa sa Palarong Pambansa ang ilang bantayanan. Ang 30 niini sa Siyudad sa Sugbo ipahigayon.

Gilauman sa kapulisan nga daghang atleta ang moabot sa Sugbo nga gibana-banang moabot og 12,000 wala pay labot niini an sports officials, VIPs ug VVIPs nga gikan sa nagkalain-laing Probinsiya sa Pilipinas.

Gipaabot nga karong Hunyo 29, 2024 mohimo og walkthrough ang kapulisan sa mga sports venue aron matan-aw kung andam naba ang mga pasilidad nga gamiton.

“So by June 29 mag-start na ang atoang mga deployment skeletal lang muna dahil mag start ang period covered sa Palarong Pambansa is from July 6 to July 16 so July 1 to 5 expected ang arrival sa mga delagates or mga participants sa Palarong Pambansa and then sa July 6 naay pagahimoon nga orientation sa sa technical officials sa maong big event and by July 9 naay opening ceremony didto sa Cebu City Sports Center 3:30 to 5pm, naay parada nga buhaton diri banda sa may Fuente going to Cebu City Sports Center,” sigon ni Dalogdog.

Nagkanayon si Dalogdog nga nag-request na sila og dugang augmentation sa police personnel gikan sa City ug Provincial Police Offices.

“So naa sila’y na-commit kaya lang medyo gamay-gamay kay nagkataon pud nga naa puy activity sa Cebu Province ug kining Mandaue ug Lapu-Lapu City apil pud ni sila sa Palarong Pambansa, naay mga sports venues nga sakop sa Mandaue ug sakop sa Lapu-Lapu City pero majority at least 30 ka sports venues diri sa Cebu City,” ni Dalogdog pa.

Suportado ni Police Regional Office-7 Director Brigadier General Anthony Aberin ang Cebu City Police Office pinaagi sa pagpadala unya og augmentation gikan sa Regional Mobile Force Battalion (RMFB)-7. (BANAT NEWS)