Taskforce umolon aron mahuman na ang CCMC

CEBU , Philippines — Tinguha ni acting Cebu City mayor Raymond Alvin Garcia nga mag umol og taskforce nga maoy motutok sa kahumanan sa Cebu City Medical Center.

Kini aron masiguro nga mahuman apil na ang 10th floor sa maong tambalanan.

Gipakigtagboan ni Garcia ang pipila ka mga department heads aron sayran sa kalambuan sa trabaho sa CCMC.

Nanambong sa maong tigum ang mga opisyal sa tambalanan, City Planning and Development Office, Department of Engineering and Public Works, Department of General Services ug uban pa.

Gibutyag sa acting Mayor, sunod semana pirmahan niya ang kamanduan sa katukuran sa Task Force CCMC.

Samtang gibutyag usab Cebu City councilor Jerry Guardo nga posibleng himoon ang re-bidding alang sa pagkompleto ug pagtapos sa phase 4 sa CCMC karong buwan sa Agosto.

Si Guardo kinsa maoy gitudlo ni acting mayor Garcia nga overseer sa CCMC mitug-an nga base sa ilang weekly meetings nasuta nga aduna pay P648 ngadto sa P650 million nga pundo alang sa pagkompleto sa phase 4.

“We still have available funds of I think P648 million or P650 million that are up for grabs for bidding…I think they have scheduled start sa bidding sometime August siguro…Mao nay timeline nila,” suma pa ni Guardo sa interview sa The Freeman.

Ang nahisgutang pundo wa magamit human gi-terminate ni mayor Mike Rama ang kontrata sa pagtrabaho sa phase 4 tungod kay matud pa hinay ang pag-trabaho.

Inay nga mopahigayon og bidding alang sa laing contractor mas gipili ni Rama nga himoon ang public-private partnership.

Samtang si Mayor Rama nakakuha usab og daghang pledges gikan sa mga negosyante gikan sa manila alang sa pagkompleto sa kinatibuk-ang napulo ka andana sa CCMC.

Suma pa ni Guardo nga kun kinsa man ang winning contractor, mao na kini ang mokompleto sa 3rd ngadto sa 6th floor ug ang portion sa 7th floor tungod kay dunay parte niini nga gitagana alang sa Operation Smile.

Dugang pa ni Guardo nga halos andam na ang tanan alang sa Operation Smile apil na ang mga operating tables apan dili sila makasugod og abli gumikan kay wala pa mahuman og trabaho ang koryente ug ang service elevator.